روائع نسران للعقارات

عليت ياراس بعـــزّك تعليت للاستاذ/ عبدالمحسن بن محمد القباني


عليت ياراس بعـــزّك تعليت للاستاذ/ عبدالمحسن بن محمد القباني



ضرماء ـ صحيفة ضرماء :

.

محمد بن عبدالمحسن القباني رحمه الله

مرثيه في والدي رحمة الله المتوفى بتاريخ 1426/12/16هـ .. 
تنشر لاول مرة .. 

.

يامسندي ياليتني منك ماوحيت
بيتين واحيت بي جروح عليله

 

ذكرتني يومي نسيت وتناسيت
وداع من قفى ولافيه حيله

 

يامطرق حامي على كبدي اوميت
ارفق على كبدي جروحي مهيله

 

ياليتني قبل يتوفى توفيت
والا كفوفي من ترابه تشيله

 

وياقبر لو تدري من اليوم ضميت
ماعاش فيك الدود باللحد ليله

 

وياقبر لو تدري من اليوم ضميت
صارت نصايبك القصيرة طويله

 

حدرت فيك اغلى من اغلي وسميت
ورصيت لبن فوق لحد بني له

 

وهديت فوقك من ترابك وشديت
نصايبك فوقك ابيها دليلة

 

وطلبت له ربي دعيت والحيت
عساه بالفردوس جار لخليله

 

ويادمعي ان هليت والا تواريت
الحب لـِ عرق وش الي يزيله

 

ويابوي لبى ضحكتك كل ماوحيت
صوتك يلج بوسط قلبي صهيله

 

ويابوي لبى ونتك يوم ونيت
حملك على كتفي ازمه واشيله

 

ويابوي لبى خطوتك كل ماقفيت
ولبى المكان الي تحب وتجي له

 

عليت ياراس بعـــزّك تعليت
عاصرت من عمرك سنين طويله

 

اخذت منك العزم والصبر والصيت
واخذت منك المرجلة والجميله

 

يالله طلبتك لـِ تكرمت واعطيت
تجبر عزى قلبٍ همومه ثقيله

 

وعسى العوض في راس من له تهقويت
يحيي نباي وسيرتي عند جيله

 

سمي ابوي وعزوتي لـِ تعزويت
الي ليَـ من انتحيت انتخي له

 

انشهد اني فيه همت وتشقويت
وارجي من الله له علوم جزيله

 

هذا جوابي يابعدي يومك ابديت
والهرج يكفي عن كثيره قليلة

 

انشهد انك مسندي لـِ تراكيت
انته واخوك سيوف هندٍ صقيله

 

وصلاة ربي كل ماصبحت وامسيت
في كل وقت وكل فرض ونفيله

 

على النبي اعداد من حج بالبيت
واعداد ماهل المطر من مخيله

 

عبدالمحسن بن محمد القباني
كتبت في 1426/12/25 هـ


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *